nasren

خاوەنپێداویستییە تایبەتەکان داوای زیادکردنی موچەکانیان دەکەن کە ٦٠ بۆ ٩٠ هەزارە

خراپى دۆخى ژیان و نەبووی و کەمى ئەو موچەیەى وەریدەگرن، خاوەنپێداویستیە تایبەتەکانى کۆکردووەتەوە، ئەوان داوایانکرد دەستکارى پاشەکەوتى موچەکانیان بکرێت تا کەمێک لە ناڕەحەتییەکانى ژیانیان کەم بێتەوە.

لە هەرێمی کوردستان نزیکەی ١٠٠ هەزار خاوەن پێداویستی تایبەت هەن، لە کاتی سیستمی پاشەکەوتدا، حکومەت موچەی ئەمانیشی پاشەکەوت کرد و ئێستا بەشێکیان موچەکانیان بووە بە ٦٠ هەزار و بەشێکیشیان بووە بە ٩٠ هەزار دینار.

ئێستاش سیستمى نوێی پاشەکەوت کە مانگێکە حکومەت خستویەتییە بوارى جێبەجێکردنەوە، خاوەنپێداویستییە تایبەتەکانى نەگرتووەتەوە و داوا دەکەن هاوشێوەى فەرمانبەرانى دیکە سیستمەکە ئەوانیش بگرێتەوە.

لە پاڵ ئەو داوایەدا خاوەنپێداویستییە تایبەتەکان داوا دەکەن حکومەت ئەو نۆ موچەیەشیان پێ بدات کە تا ئێستا پێیان نەدراوە.

بەرپرسانى رێکخراوەکانى داکۆکیکار لە مافى خاوەنپێداویستییە تایبەتەکان دەڵێن، ئەگەر داواکارییەکان جێبەجێ نەکرێت، ناچارن خۆپیشاندان ئەنجام بدەن.

ئەمە یەکەمجار نییە خاوەنپێداویستییە تایبەتەکان بۆ داواکردنى مافەکانیان گردبوونەوە ئەنجامبدەن، بەڵام وەک خۆیان دەڵێن حکومەت گوێی بۆ داواکانیان نەگرتووە.